Hier is 'n paar artikels wat in die media verskyn het oor die Britannica Junior: Ensiklopedie vir Suidelike Afrika. Dit is uitgegee deur Jacklin Enterprises. Dawid van Lill (derde van regs onder) was die redakteur.
Kinderensiklopedie sien die lig
2010-02-16 05:32
KAAPSTAD. – Die eerste nuwe Afrikaanse kinderensiklopedie in 20 jaar het pas die lig gesien.
Die Britannica Junior: Ensiklopedie vir Suidelike Afrika is in samewerking met die Universiteit van Stellenbosch se Taalsentrum, wat die meeste van die vertaal- en redigeerwerk gedoen het, onder leiding van die redakteur, Dawid van Lill, deur Jacklin-uitgewers uitgegee.
Die ensiklopedie bestaan uit tien bundels. Volume 1 tot 9 is alfabeties gerangskik en die 10de is ’n indeks.
Dit is gemik op die ouderdomsgroep 8 tot 16 jaar.
Dié ensiklopedie is hoofsaaklik ’n vertaling van die Amerikaanse weergawe en het 3 000 foto’s. Altesaam 20% van die inligting is egter uitgehaal en vervang deur artikels wat oor Suider-Afrika handel. Dit bevat inligting oor onderwerpe soos apartheid, Bafana Bafana, die Cullinan-diamant en Robbeneiland.
Van Lill het gesê heelwat navorsing is in biblioteke gedoen om te bepaal watter temas en onderwerpe relevant in die Suid-Afrikaanse konteks is.
“Die internet is nie in alle dele van Suid-Afrika beskikbaar nie en boeke is dikwels die enigste manier waarmee leerlinge inligting kan bekom.”
Volgens mnr. Mike Jacklin van Jacklin-uitgewers van Johannesburg bestaan ’n groot behoefte by biblioteke, veral in die Wes- en Noord-Kaap, vir gedrukte Afrikaanse navorsingsbronne vir kinders.
“Die ensiklopedie sal binne die volgende paar weke in elke biblioteek in die Wes-Kaap beskikbaar wees en kort daarna elders.”
Prof. Leon de Stadler, direkteur van die Taalsentrum, het gesê die neiging tot digitale navorsing onder kinders speel ’n sentrale rol in die intellektuele vervlakking van die jeug.
“Die internet gee aanleiding tot ’n kultuur van kits-kennis, terwyl boeke leerlinge in staat stel om meer in voeling met die konteks van die inligting te wees.”
Prof. Felix Banda van die departement linguistiek aan die Universiteit van Wes-Kaapland het gesê leerlinge gaan baie meer noukeurig met gedrukte as digitale inligting te werk.
“Kinders het dikwels die geneigdheid om net te knip-en-plak wanneer hulle met digitale kopie werk.”
- Volksblad
.jpg)
.jpg)
.jpg)
